中環在線：新增即時通訊功能
支付寶同微信「撞樣」
阿里巴巴關聯公司螞蟻金服或者了解到「If you can"t beat them, join them」嘅道理，最近推出嘅新版本支付寶錢包，功能居然變得同微信非常相似，最主要是加入通訊功能，用戶可以用支付寶收發訊息，亦可以隨時同朋友發
紅包及轉賬，甚至炒股投資買基金都得，孖生兄弟一樣。不過，佢哋除咗功能好似，仲撞埋個樣㖭！
App版面名稱跟到足
點撞樣法？兩個手機App嘅設計排列，望落真係大同小異，好似想加朋友，都是在手機右上角選擇「添加朋友」一項，加朋友嘅方式都有「掃一掃」、「面對面建群」、「手機聯繫人」等方式，雖然模式差不多，都是透過掃描二維碼、手機已儲存嘅電話簿聯絡資料等，但連個名都要跟到十足十？樣樣都做到似層層，如果畀一個新用戶，隨時分唔到邊個打邊個囉。
要講兩個Apps嘅最大分別，就只有手機App標誌則由「阿里橙」變為「螞蟻金服藍」，與綠色嘅微信有別，加上支付寶首頁是購物付款，而微信首頁則是與朋友對話。若果唔睇清楚，真係用錯咗都唔知。
對比微信今年首季有5.67億用戶，螞蟻金服發言人表示，支付寶則有4億用戶，而手機版支付寶的設計主要是向阿里的即時通訊App「來往」致敬，之但係，來往推出嗰陣已經有人話同微信好似，結果都無能力同微信分庭抗禮。兩間公司各自推出的王牌App，結果就越嚟越似，到底最終是方便用戶，定係扼殺創意呢？
馬雲寸雷軍 講三句變三百句
聯控（3396）成功上市，還咗71歲的柳傳志最後一個心願，返到中國佢哋搞咗個慶功宴，阿里巴巴集團主席馬雲同小米創辦人雷軍都畀面出席。點知馬雲開始講嘢，恭喜完聯控之後就明寸雷軍：「剛才雷軍說講三句話，講了三百句。我三百句講不到，但是我得多說幾句」，之後先再講其他嘢。
馬雲點解要寸雷軍？皆因佢之前上台致辭雖然表明「我就講三句話」，但結果講咗三大段話先肯收手。不過雷軍當正柳傳志係佢「教父」，當年雷軍首次創立金山軟件（3888），一度因競爭搞到差啲「執笠」，結果聯控1998年出手投資450萬美元，令公司重新發展。雷軍今次見到聯控成功上市，難怪佢會一時感慨講多兩句。
之不過，小米同阿里過往比較少合作，今次馬雲明寸雷軍之後，唔知兩間公司仲有冇合作空間呢？
阿里插水 馬雲身家減六百億
中國股市「暴力跌市」，拖累美國上市的內地科網公司齊齊插水，連市值最大的阿里都難逃一劫。阿里日前曾跌至76.21美元，創上市後新低，其後雖略為收復失地，但仍未守穩80美元，收報79.62美元，跌0.76%。
如以新高120美元計算，意味一度成為中國首富，並持有阿里7.8%股權的主席馬雲，身家已由「全盛時期」的232億美元，短短半年左右就跌至154億美元（約1,201億港元），身家蒸發78億美元（約608.4億港元），難怪馬雲早前說「後悔阿里上市」。
至於阿里「難兄難弟」騰訊（700），主席馬化騰都唔會太開心，事關之前佢以私人身份入股的平保（2318）、復星（656）、聯控（3396）及華泰（6886）等，過去一個月都大跌，騰訊過去三日更累跌13%，如以馬化騰持有騰訊9.64%股票計，已「慘蝕」183.6億港元。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
