熊市策略要識自保
2015年07月09日
昨日一講港股進入熊市，呢隻熊馬上擴散，都可以話係「好嘅唔靈醜嘅靈」啦。港股昨日最多插逾2000點，幅度接近7%，臨近收市跌幅收窄，都跌1458點，跌幅5.8%，呢啲市風高浪急，大家要睇路，唔好咁勇呀。
睇咗阿爺救市三日，發覺佢出手時慳水慳力，無用到大筆真金白銀救市，只係用緊21間券商集合來的1200億的一部份去救，杯水車薪，止唔到跌勢。內地救市頭兩日在兩點半仲有像樣反攻，昨日兩點半後都無力，真係滴汗，最後跌5.9%險守3507點。
咪靠晒阿爺打救
早兩日話香港跌係內資來港班錢救市拖累，但前晚夜期大插700幾點，昨日大市再跌1458點收場，就唔似咁簡單，?家要留意係跌開有條路，會唔會惹來外資大鱷借勢走嚟造淡搵食，將香港變「提款機」。若然情況惡化，阿爺處理不善，就有可能爆出風暴式波動，吹埋去其他金融領域，禍及香港。
在牛市時見回吐買股，但轉熊市時要保命為先，唔好見平就買，否則買完再跌就好痛。家陣要做好風險管理，保住自己命仔，好多股票大跌完係幾平，只係環境咁不明朗，有好多事情不易估計，股民要自己做定最壞準備。
A股由爆升到監管機構查處兩融篤爆個波，有小小黑天鵝味道。本來內地股市係政策牛，但搞得手震震，無端端變咗政策熊，我覺得呢場風波事前事後都可以避免，但無做好愈玩愈大，估佢唔到。
由於劇情已經唔按劇本發展，股民就要做好應對，當正萬一發生風暴都頂得住的標準去管理風險，咁樣點都無壞。升市莫估頂，跌市莫估底。
A股成為跌市之源，阿爺對大媽，各部委紛紛加入救災。財政部承諾不減持所持有的上市公司股票，要求中央管理的國有金融企業不減持所持有的控股上市公司股票，支持國有金融企業在股價低於合理價值時予以增持。
人行及中證監先後「出口術」，及推動央企承諾暫不減持股票，而中證金向121家證券公司提供2600億元人民幣信用額度，惟「大媽」們全不領情，上證綜指收報3507點，跌219點或5.9%。深成指跌3%。創業板指數則反彈0.5%。
港股跌幅差唔多，恒指最多曾插2139點低見22836點，尾市跌幅收窄，收造23516點，大跌1458點或5.8%；國企指數收報11107點，跌720點或6%，成交2360億元。恒生指數連跌四日，共瀉2766點或10.52%，國指更五連瀉，累插1874點或14.44%，股民唔止利潤蒸發，好多已經輸入肉。
跌到入肉 滿街鮮血
中環茶友呢次升市無乜追貨，高位仲沽咗少少貨，依家滿街鮮血，覺得有啲股票都幾抵買，但驚個市再插，有錢都唔敢執，仲諗緊連手頭少少貨係咪都要沽埋佢，思前想後決定都係唔買唔賣，乜都唔做。佢話，賤物鬥窮人，都係寧願等個市定番啲，又或真係超值大平賣先用埋個兩粒子彈喎。
茶友係驚青一族，睇佢個樣都唔敢接跌落嚟嘅飛刀。大行就唔同，此輩要做生意，而且係用人家銀両炒作，一於繼續出報告教人買賣。
高盛中國策略分析師劉勁津預計，內地槓桿資金不足以引發市場崩潰，A股還沒到泡沫的程度，仍有增長空間，未來一年滬深300指數將反彈27%。佢仲話，在政府的支持措施下，投資者信心會上升，寬鬆的貨幣政策也將刺激經濟增長。
匯豐證券都發表報告，將A股評級由4月時的「減持」，上調至「中性」，預計A股反彈。摩通大通就發表報告，唱好本港上市的內地環保公用股。
你知阿爺救市咁惡，外資又被指唱衰，唔知會唔會做番啲嘢。所以我以平常心睇報告，唔敢盡信。
陸羽仁
金融High Tea 舊文
