女神tea time：輸錢就是任性
■大媽借孖展借到爆煲，香港股民硬食陪葬。 美聯社
A股後市點收科就未知，但肯定中國政府嘅聲譽已毀。連日救市措施，已見到中央係點樣夾硬嚟，再唔係就「捉鬼」屈外資沽空要嚴懲。噚日睇高登，有網友將外媒報道中國股災嘅報道結集。其中最精采嘅，莫
過於德國報章《Handelszeitung》起嘅標題：這次金融風暴將會是「Made in China」，內文講明今次係中國自製危機，過度槓桿引致。
中國為實現中國夢，自己吹起股市，製造出一個巨型炸彈，增加硬著陸危機，仲老屈外資惡意沽空。情況就似一個賭仔輸身家，發茅屈賭場呃佢錢，反映佢已冇曬計，輸錢就是任性。噚日最新有傳，中證監要求向上市公司大股東同高層，如曾於近半年內減持，強制要作出一定比例增持。
最慘係，大媽借孖展借到爆煲，香港股民硬食陪葬，港股噚日曾創有史以來最大跌幅。內地人成日都話，「要不是中央政府照顧你們香港，完蛋了」。麻煩以後唔好再俾我聽到呢句，阿爺為咗暴力救A股，於是暴力沽H股，實情係「要不是香港俾你沽，你們A股一早完蛋了」。
可幸嘅係，以往大家驚大媽玩港股，會劣幣驅逐良幣。經此一役，大媽走咗唔少，料港股逐漸回到正常投資思維，會睇基本因素嘅外資同港資主導市場，料港股距回歸理性時候不遠。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
