中環在線：
港交所前董事擁Aston Martin
老爺車5年升值400萬
■李佐雄養到一部咁靚嘅Aston Martin DB6老爺車，唔捨得賣。 楊柏賢攝
占士邦新片《007：鬼影帝國》剛上畫，噚日喺中環舉行一年一度嘅老爺車展，亦發現占士邦都鍾意用嘅英國跑車Aston Mar
tin，車主正是港交所（388）前董事兼佐雄證券老闆李佐雄。
占士邦喺之前電影駕駛嘅Aston Martin DB5出曬名，李佐雄擁有呢部係DB6，1965年出廠，第2次參展。原來佢同老爺車發燒友、會計師公會前會長周光暉好老友，受對方影響，鍾意埋玩老爺車。
周光暉2010年幫佢喺英國買呢部車返嚟，當年車價100萬元，連稅要畀200萬元。周光暉保守估計，部車𠵱家淨係車價都已經升到600萬元，投資回報可觀，不過李佐雄暫時唔諗住賣，一來只得一部老爺車，二來怕賣咗搵唔番同款心頭好。
佢放假得閒會揸部車出街，可惜香港地成日塞車，難以發揮部車最高時速150公里嘅水準，佢又話，60年代出廠嘅車，冇預到天氣咁熱，「如果香港落到10度左右，佢（部車）就好似番咗鄉下咁開心。」認真有心得。
■香港老爺車會今年第36年舉辦車展。 
■米高．嘉道理帶部 Bentley出嚟參展。 
■呂耀華（中）到一到參觀，同友人傾咗一陣就走人。 
■呢部1935年Ford乃全場最老嘅老爺車。 米高．嘉道理帶賓利參展
中電（002）主席米高．嘉道理亦有部1977年嘅Bentley T2參展。佢話平時得閒會同其他發燒友一齊揸車去大亞灣等地方郊遊，日常就以Honda代步。同場亦發現嘉華（173）太子爺呂耀華嚟行咗轉。
今年係香港老爺車會第36年舉辦車展，全場有104部車，雖然落毛毛雨，但班車主話冇乜所謂，最緊要開心。
■呢位仁兄所畫嘅1973年Ferrari Dino246 GTS幾靚。 參觀者即場寫生
噚日老爺車展，有一道特別風景，就係唔少人擔櫈仔坐喺車前面，為老爺車寫生。見佢哋拎住簡單工具，一本簿，幾支筆，再加個調色盤，輕易就將一部老爺車畫得活靈活現。好似呢位仁兄所畫嘅1973年Ferrari Dino246 GTS幾靚，唔可以擁有部車，畫佢出來留念都幾好吖。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
