笑到最後：恐襲變戰爭 股票高危
10月4日，高明喺本報《周日投資導航》推介創科（669），建議買入價28蚊，推介翌日開市29.7元，去到月中股價回落到27至28元買，上周一股價一度衝上33元。
上周一創科到價33蚊一閃即逝，高明嘅fans即使跟足指令，到價賣出嘅機會近乎零，第4季至
今港股浮浮沉沉，有隻推介股到價算係省嚇招牌。若未沽到，建議30元樓上先食一半，回落至28元全數沽出，冇回落由佢繼續升。
第三季受過教訓，高明推介安踏（2020），建議即買，翌日開17.64元，遇上股災入市後第三日穿16元止蝕價，之後低位冇再見過，以大漲小回方式每1蚊破上去，上周五收報22.25元，再次向高位尋頂。
事後，高明即刻諗：一、港股大時代已結束，睇啱心水股，等多兩日先買都冇壞，安踏中咗次伏，創科學到嘢擺低啲入；二、創科算係攞個尾彩，上周推介過嘅美股Activision Blizzard擺埋一邊，今年餘下時間唔需要有太大動作。
上周五巴黎受襲，高明希望遇難者安息及受害者早日康復。其實今次唔單止係恐怖襲擊，更加係一場戰爭，現時對經濟及股市最大黑天鵝，就係戰爭。呢個年代，恐怖襲擊都係戰爭一部份。大國之間商業利益，互相攻打機會極低，世上比較有規模嘅國家進步得太快，小國獨裁政府幾癲都好，舊式打仗模式面對大國肯定一打即輸，恐怖襲擊係佢哋唯一手段。
股票係社會和平同富庶嘅投資工具，有閒錢又唔會擔心人身安全，就會買股票；相反，一旦打仗，公司都可能炸埋，「投資者」要著草上船，船家連貨幣都未必收，因為驚貨幣貶值，個個都只係想揸金銀呢類「交易工具」，買個麵包都好，股票就會成為最劣等嘅資產。
恐怖襲擊變成戰爭一部份，民居下一秒隨時會變成戰區，人命唔受保障，投資股票將會離地過上天堂。高明只希望世界和平。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
