中環在線：範智廉明言接班人搵外援
滙控新董事隨時做主席？
獅子行傳統，一直以來都由內部管理層晉升為集團行政總裁與主席，但面對近年違規罰款風波，同埋監管機構與股東壓力，無論現任主席範智廉再坐幾耐，董事會已經承諾，佢嘅繼任人一定由外邊聘任，所以一有新嘅非執董人選獲委任入局，好自然就會令
人聯想，此君會否係滙控（005）逾150年來，首位外聘主席叫糊人選。
近期頻爆滙控堅料嘅英國《天空新聞》報道，英國餐飲集團Compass Group主席Paul Walsh，將獲委任為滙控非執董，接替其他卸任董事，如擔任BBC託管人嘅Rona Fairhead。
Walsh沒有金融背景非人選
Walsh過去亦曾擔任國際知名酒業集團Diageo行政總裁。但據了解，Walsh應該唔係未來滙控主席人選，唔知係咪同佢背景，完全冇金融經驗有關。
但無論點，主席估領袖遊戲要再繼續再玩嘞，事關《天空新聞》亦透露，嚟緊滙控仲會委任多一位新嘅非執董。
今年4月，《天空新聞》爆料，滙控已為下任外聘主席鋪路，一直幫集團尋找非執董新血嘅英國顧問公司MWM Consulting，已指示獵頭公司，物色非執董時，對方要具備擔當主席嘅能力。
剛公佈季績嘅滙控，日前亦被傳媒問到，下任行政總裁會唔會都要外聘？範智廉就話，下任主席由外人出任已無懸念，至於行政總裁，就要由董事會聽取股東意見後決定。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
