魚樂無窮：尋習馬會概念股
■股民以為深港通重臨，帶動港股曾狂升700點。 李展翹攝
人民銀行網站將周小川半年前舊文章當新嘢post上網，全世界瘋狂轉載，股民以為深港通重臨，不問價搶貨，帶動港股曾狂升700點。新華網中午澄清相關文章係摘錄自5月27日，港交所（388）亦發通告，指深港通
仍未開綠燈。以為個市會散？港股埋單仲有近500點升幅，A股更狂升4%，硬淨得離奇，似乎唔係一般炒錯市咁簡單，且看有冇消息跟尾。
另一個焦點，係周六喺新加坡上演嘅習馬會，市場憧憬呢個世紀會面，有望為兩岸帶來新商機，內地上市嘅福建概念股全部漲停，在港上市嘅廈門港（3378），雖然炒高13%，但依然屬於海底價，升勢有餘未盡。
何解係海底價？睇股價，廈門港比起今年股災低位，反彈34%，同業大連港（2880）期內彈51%，廈門港落後幾條街。秤估值，廈門港預測市盈率12倍，大連港20倍，廈門港變相六折有售。廈門乃福建省最大港口，乃兩岸交流必經之地，廈門港享盡地利，集團於接近30個泊位經營集裝箱港口業務、散貨散件雜貨港口業務，及港口配套增值服務。廈門屬其中一個自貿區試點，9月時曾簽訂72個項目，總值超過460億人仔，連同一帶一路商機，廈門港分到少少餅仔，已經不得了。現價較今年高位仍低六成，噚日成交大增13倍，派對開始了！
唐牛
https://www.facebook.com/tongcow88
唐牛
魚樂無窮 - 唐牛 舊文
