小詐胡 真夾高
2015年11月05日
港股昨日食咗鋪小詐胡。人民銀行網上午掛出行長周小川講話，預告深港通會喺年底啟動，港股即刻爆上，最高升700點以上。之後人行澄清原來周小川講話係五月份作出，個市收到消息即刻沉番幾百點。
但點解話係小詐胡而唔係大詐胡呢？因為上午港股升得多內地升
得少，但到人行澄清消息後，內地股市發威爆上，帶動港股企定，高位回落係咁多，睇嚟反彈係有啲未盡。
細睇港股昨日早上飆逾700點時，港交所(388) 發通告話，知悉公司股份價格及成交量有不尋常波動，及傳媒引述中國人民銀行行長就深港通於今年推出的報道，但有關建立深港通的建議仍待監管機構批准，而且洽談未與相關機構達成結論。港交所出完通告，跟住人行就澄清，周小川的深港通評論，摘自5月27日的講話，搞出個淋冷水嘅反高潮。
SDR概念襟炒啲
雖然無咗深港通的好消息，港股由高位一度回落300點，但內地股市喺金融股帶領下，一路上揚，借住習近平同馬英九會面，福建自貿區概念全線漲停，午後藍籌權重股發力，滬指漲幅超4%。喺咁環境下，港股雖然食詐胡，但氣氛仍然唔差，恒生指數收報23053點，升485點；國企指數收報10560點，升277點，成交增至1121億元。
上晝港股借深港通爆升，陸羽仁當然已經覺得，呢個唔係大市彈升最大因素，須知滬港通開咗到?家，交投有幾多大家有眼見，上海股市重要性大過深圳股市，開通之後港股嚴格嚟講無進帳，?家深港通就算真係有又如何？
昨日A股個市大升，但據騰訊新聞做的調查，有人認為?家只係反彈，認為牛市重啟者只有28%。當問到個市反彈最高可唔可以升穿3500點，有18%答唔可以。按照散戶永遠是錯的規律，佢哋普遍唔覺得大市係牛，樂觀性情緒唔係咁濃厚，個市應該仲可以彈上啲。
若講政策重要性，我始終覺得人民幣入國基會特別提款權較為重要，因為中港股票互動，只係國家內部的事，人仔入特別提款權(SDR)就係國際大事，大大提升人民幣地位，炒作想像空間大啲。
咁講唔好以為我覺得人仔入特別提款權嘅概念無限大，好多人都話呢個權即時作用較細，主要係象徵意義多啲。但講到底，呢樣嘢新鮮啲，未落實前大家會有興趣啲，借佢炒上落會比較有力。至於真正影響有幾大，都要落實後一年半載至有分曉啦。
新經濟股落鑊
除咗大路股份，軟件與手機遊戲股亦急升。聯眾(6899) 揚6%，網龍(777) 爆升22%；金山軟件(03888) 升5%；騰訊(700) 走高1.7%，報153元；中軟國際(354) 、金蝶(268) 升近7%。
科網股有表現，理由有幾個，個別炒作理由好似網龍就炒吓教育概念，騰訊就炒吓雙11光棍節網購，大圍氣氛就係五中全會出好多政策，但大家對舊經濟股興趣唔係咁大，既然阿爺話要搞科網，想炒新唔炒舊，咁資金就湧入去炒一陣。未來估計個市都係貪平撈底就炒一輪經濟股，炒一陣想貪新鮮又轉炒科網新經濟股。新經濟股郁得快，大家最好睇住價位來落注。
近排新股上市續多，市場消息表示，中國休閒食品及飲料公司達利食品(3799) 擬按招股價每股介乎5至6.15元。據銷售文件指，達利上市後，市值未計行使超額配股權為684.71億至842.19億元，以旺旺今日收市市值822.7億元計，達利上限市值剛好超越旺旺，咁旺旺會唔會發力保住零食王嘅寶座呢？
陸羽仁
金融High Tea 舊文
