智取大市：睇實龍尾炒龍頭
■中石油圖表開始有些少轉強跡象。 資料圖片
港股的確進入不可思議嘅強勢，呢一刻資金開始由大藍籌轉番去強勢二三線股，追落後充其量有綠城中國（3900）、富力（2777），其實本身都唔算好落後。未炒到真正嘅龍尾股，相信好友都唔會收手，但炒還炒，好好記住「物極必反」
，要保持見頂危機意識。
就當大藍籌大升浪已接近盡頭，只有騰訊（700）繼續拉升大市，但二三線強勢股之中，內房、汽車、科網、資源、燃氣、內險等等，相信會輪流破頂多一轉。二三線科網股近期未見破頂，燃氣股亦未起動，內房股龍頭恒大（3333）、融創（1918）距離高位尚遠，稍後仍有機會爆發，仲有非強勢嘅中遊股如內銀，遲早都出嚟助慶。先後次序太難估，最穩陣係揸住上述板塊股份，等輪流爆上，大成交急升食得糊時，先套現換馬至未破頂股份。
最後晚餐，始終會輪到大落後股上場，石油股、消費股喺今轉牛市輸曬，中海油（883）、中石油（857）圖表開始有些少轉強跡象，遲早輪到三桶油成為焦點，加上恒安（1044）同康師傅（322）都準備起哄，當然，點少得藍燈籠中移動（941）。當強勢股不再強、落後股又翻生，警號就響起，到時落車都唔使人提。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
