大股熱爆 細股凍「殭」
2017年08月09日
港股繼續升，但大股有大股升，好多股仔就逆市跌，港交所出手整治殭屍股，對細股形成心理陰影。同一時間，亦都有啲本來質素唔差嘅二、三線股爆出負面消息，搞到好似騰訊(700) 升唔停嘅大股熱爆，細股凍「殭」嘅兩極局面。
華多利恐慌性散水
細股無氣氛，有人話係股市冷靜，牛市未癲嘅證明，睇真其實係有佢特別嘅大氣候，內裏涉及政策因素。細股難玩理由之一，係港交所同監管機構近排接連出手整治殭屍股，好似做開二手車輛貿易和放債業務嘅華多利(1139) 就接獲港交所(388) 通知，已決定暫停公司股份買賣及將公司列入除牌程式第一階段。
華多利急挫，喺低位收報0.185元，再插近40%，喺股東恐慌性散水下，市值由早前維持喺5、6億元快速插到只有1.7億元，遠低過殼價6億元好多。華多利去年收入僅490萬元，被指收入不足以支付集團嘅費用及開支，一旦除牌隻殼報廢，呢個結果對好多無乜業績嘅殭屍股嚟講都咪話唔驚。
有中環茶友笑言，港交所依家都要搵公司上市保住盈利，殭屍股賣殼等如變相爭生意，郁你有乜出奇，所以以前好多公司諗住有錢畀上市費用就唔使驚，呢支歌唔同咁唱法，對股仔同莊家心理影響都好大。
無業務嘅公司頭痕，業務走樣嘅公司都一樣會變輸錢陷阱。手機設備股當炒，但有造手機外殼同防水部件嘅通達集團(698) 就突然發出盈警，股價隨即大插。之前大股東喺高位減持，陸羽仁預測過佢股價易升難跌，依家爆出負面消息，睇真其實有路捉。
內房再現翻炒跡象
通達集團發盈警，喺受應收貿易帳款及其他應收帳款減值，加上籌備新產品導致研發開支增加影響，預計中期純利將較去年同期減少20%至30%。大行花旗就發表報告，表示進行行業研究後，認為減值主要因為樂視和酷派(2369) ，自七月起基於樂視財困，通達將再錄得約一億元存貨撇帳。另外，研發開支將佔通達全年總收入約4%，當中大部份喺上半年投資，主要為準備新iPhone防水部件嘅前期開支。該行力撐，通達下半年來自華為和Oppo定單穩定，玻璃外殼同防水零件業務有條件表現強勁，維持「買入」評級。
通達爆出存貨撇帳，之前推介佢嘅大行都中咗招。睇番通達主要股東喺五月份時趁股價炒上3元樓上，以每股2.85元配股套現。之後股價開始反覆腳軟，當時有傳大客戶華為及Oppo突然減少定單，後來又傳佢可能畀沽空機構狙擊。當時管理層話唔知點解股價會急跌，董事會仲宣佈或會考慮進行場內購回股份。其後公司真係有喺市場買吓股。不過當時陸羽仁就覺得，大股東既然減持得，無乜道理大手回購，佢嘅配售價應該係短期頂價，而家睇佢插落嚟，當時兜底買貨如果無走到，就全部成為輸家。過往遇着呢種高位散貨再爆壞消息嘅情況都好負面，今次雖然大行力撐，但都有大行唔客氣降佢級，睇嚟佢股價都已經內傷。
股仔無運行，大股就續升，股王騰訊(700) 噚日再破頂，推動港股逐步逼近28000關，恒指最多升174點，高見27867，收市穩站於27800以上，全日升164點，成交逾971億元。內房股有翻炒跡象，重申無意出售澳洲發展項目嘅萬達酒店(169) 大漲16%收報1.16元；綠城中國(3900) 升8.27%報收11元；富力(2777) 收升6.37%報15.04元；融創中國(1918) 升4.54%報收19.34元；恒大(3333) 收升4.31%報19.38元。
陸羽仁
金融High Tea 舊文
來源 source: http://hdfin.stheadline.com
