茶渣價至好買股
2014年02月05日
馬年首個交易日，造出黑到唔黑的黑盤。港股跟美股跌，而且由頭跌到落尾，恒指彈都無得彈，下午歐洲開市後，沽壓明顯加大，最多跌647點，恒指跌穿21500支持，跌至去年7月底以來最低，低見21388，收市報21,397點，挫637點，跌幅2.9%，創一年半以來最大單日跌幅；國企指數全日低位徘徊，收報9,509點，大跌308點，跌幅3.1%，成交達757億元。
踏入2014年我見一來就跌，都順住勢看淡，但大市一瀉如注，亦比想像中跌得急。昨日大跌市中，以行業計主要係避險的公用股得，電能實業(006) 升1.4%，收59.1元；中電(002) 升0.4%，收58.85元。我早前講過的手機股酷派集團(2369) 竟然在大跌市都升，獲高盛唱好，列確信買入名單，目標價升至5.2元，股價逆市升逾5.7%，收報4.43元見一年高位，不過升得咁急炒味好濃，若然有貨，炒股要睇路，最好定止賺位保住收穫，或者沽一部份食胡補吓身。
買了貴股就是原罪
講完升股講跌股，大市咁跌法，個股普通跌2、3%唔奇啦，但兩大「股王」昨日都交突功課啦，騰訊(700) 低見509元，收報510.5元，大跌33元或6.1%，獨力拖低大市逾100點，市值重回萬億以下。早前一直逆市呈強的銀娛(027) 也狠跌，以接近全日最低的71.5元收市，挫6.3%，兩股分別排藍籌跌幅榜第二、三名。佢哋係熱炒的大股，唯一問題係貴，若然散戶不是平價入咗貨，而係高價追貨，就要認命，建議跌10%止蝕，唔好死揸，記住買貴股是原罪。
我昨日手痕睇番中鋁(2600) 以前的高價，07年高位係26.35元，昨天收2.67元，得番十分之一，所以唔好以為買大股唔會輸身家，貴價買大股一樣會中招。若你在26.35元買咗中鋁無問題，輸一成在23.17元沽咗就得，買貴股止蝕係保命絕招。
昨日跌得最甘的是被大行唱淡的聯想(992) ，佢搞巨額收購，遇上大跌市，午後最低見8.38元，收報8.41元，接近全日低位，跌幅達16.4%，全日雄踞藍籌跌幅榜首。聯想在過年前盡顯土豪作風，在美國接連掃貨，先用23億美元購入IBM低端伺服器業務，再用29億美元買進Google旗下摩托羅拉移動，特別是買摩托羅拉惹爭議，摩通發表研究報告指，聯想收購摩托羅拉的方向正確，故維持「增持」評級，但把目標價由12.5元降至10.7元，因要為新收購的摩托羅拉業務扭虧仍然甚挑戰，估計短期聯想股價將較波動，但新收購的IBM X86伺服器業務將可彌補摩托羅拉業務的損失。
聯想破位難馬上好
我估咁大收購即使成功，要反映效益都要一段時間，但聯想股價創高後散晒，破位向下，即使有反彈，都要再展開尋底之旅，好難馬上好，除非博極短線反彈，否則唔好咁快掂。
拉闊少少講大市，在美國收水的大環境下，恐怕美股下跌也不是一步到位，即是未來仲有得跌，那些一年才買一轉的投資者，唔好心急，我會叫佢地跌到「茶渣價」才好買股。
昨日有一班美女同我拜年，佢地都心郁郁想入市，我封利是唔夠大封，唯有用演講搭夠，我拉開咗幅A50中國基金(2823) 的圖，話A50跌跌吓距離去年6月低位8.33元不遠，昨日收8.45元，我估佢今次有機會穿去年低位，可以等插近8元才入都未遲，除非分段入，否則你而家一注買晒，但一入就再跌，感覺唔好，等佢跌穿去年低位，可以話係茶渣價，買吓又無妨，唔係話佢唔會再跌，但佢追蹤內地指數，跌得多阿爺會出招托市。但我的總體觀點係不用心急買，唔跌到茶渣價唔好買，唔使急。
陸羽仁
金融High Tea 舊文
