中環在線：地下情喺新浪微博熱議奶茶妹妹掀雙馬鬥 - 李華華
■劉強東被影到同奶茶妹妹喺紐約街頭親密攬腰，惟有喺微博承認戀情。互聯網
騰訊(700)老闆馬化騰同阿里巴巴創辦人馬雲「雙馬激鬥」，竟然由正經財經新聞，搞到去同人哋嘅緋聞扯上關係。講緊嘅，係近日內地20歲「奶茶妹妹」章澤天，同39歲京東商城創辦人劉強東玩地下情，引起強國頗大迴響。女嘅樣靚清純，男嘅係商界後起之秀，鑽石級王老五，原本男未婚女未嫁，不值一曬，但事件卻將馬雲捲入嚟，馬雲躺著也中槍了。
網絡上月熱傳，章澤天同劉強東交往，兩人同時否認戀情，劉強東更反駁係馬雲耍陰招，並質疑「缺德事做的太多，就不怕遭受報應？」
事關有關傳聞喺新浪微博被狂推，而正籌備喺美國上市嘅新浪微博，其中一個股東就係阿里。另邊廂騰訊早前用16.7億元，收購京東上市前普通股嘅15%；因此劉氏被歸為同馬化騰一夥，借事件護花之餘又乘機向馬雲開炮。其後馬雲立即否認策劃事件，暗示自己係事後先知道，仲專登上網查奶茶係乜水。
馬雲公關惹怒劉強東
及至上周六，章劉兩人被拍到喺美國紐約街頭親密攬腰，有圖有真相，劉氏周初喺微博承認戀情。之後好多評論叫劉氏「還馬雲一個清白」，但前晚劉氏仍然拒道歉，「我並不是說馬雲無中生有，說他造謠……我憤怒的是他的公關團隊，一直在推這件事」。查實內地大把人用微博，如果有嘢喺微博傳開就關馬雲事，佢都好唔得閒。
李華華
mailto:LiWaWa@AppleDaily.com
上一則: 樂香園 ：李小加發窮惡 - 密西比
下一則: 中環在線：同股同權講大了李小加急補鑊 - 李華華
中環在線 - 李華華 舊文
