Change
2014/4/9 上午 09:43:21
網誌分類: 經濟
我無情情去玩現真身，竟然引來一班陳年網友加CD-ROM(唯讀)朋友浦頭，真係好高興。呢幾年股市上上落落無火氣，搞到好多朋友無出現，仲以為你地網間蒸發咗，點之仍然存在，真係意外驚喜。
昨日好多人問我點解做事咁激。我雖然細細個已經有「搞自己媒體」的打算，但人到50才實現，其中一個刺激是85歲的李四叔講到，如果他可以後生30年，即使唔見九成身家都願意。李四叔少少地都有1000億身家，唔見九成即係900億，佢後生30年即係55，我55都未到，諗諗吓覺得幾正，我有李四叔用900億都買唔到光陰，何不好好利用，做一些自己更喜歡做的事情?
腦中彈出一個「Change」字(變)，要變，走進新天地，試出新未來。當然，變不一定好，可以變得更差，所以我第一件諗到的事，是自己輸唔輸得，年青時光陰大把，未來無限，根本不用想這件事，人到中年，不能不想透一點，諗清楚輸得起才去試。
我希望網友們看完我的經歷，不要馬上湧出「創業」兩個字，希望你們看到「Change」這個字，將自己現有不好的東西Change掉，就會更好(我唔係指老婆/老公，現實所見好多人換極都係不外如是)。
我2006年7月開始寫專欄，轉眼7年多，我寫專欄的目的，就想引導大家改變，如果你炒股本來好成功，根本不用來看我寫的東西，若然你炒股不大成功，我的東西或許對你有用，我除了提供市場和個股分析外，主要想帶出一種合理的買股方法，叫你們分清「投機的我」和「投資的我」，分配好組合比例，進出有序，希望你們炒股有正回報，得道成精。若然你如今都係輸多過羸，或者贏得好少，就要Change啦。
口水完講番美股。美企業績公佈開鑼，投資者態度謹慎。美股，特別係科網股此前跌得太勁，昨日企番穩啲，撐住美股，結束連續三日的跌勢。杜指微升10點，收16256點，標普500指數升7點至1852點，納指反彈33點，造4113點，升幅0.8%，跑贏大市。
上日列舉咗幾家科技股在3月嘅慘況， Pandora及Zynga 跌約三成，Netflix 跌近四份一，Facebook 跌21%，Amazon亦 跌15%。英國《金融時報》昨日報導，全球股市整體而言，尤其係美股仍處歷史高位，但一些最著名的科技公司卻經受了2008年金融危機以來最沉重的打擊，統計市值超過200億美元的14家科技公司，總市值在一月之內共蒸發了2750億美元。14家公司包括5家亞洲公司和9家美國公司，其中騰訊(700)由3月6日至今，股價下跌近20%，市值唔見咗2483億港元(約合320億美元)。另外，韓國最大門戶網站Naver市值損失10%，日本電商集團樂天市值損失7%，雅虎日本公司市值損失26%。喺美國，Facebook股價已從3月份的高位下跌了22%，Twitter與LinkedIn股價從較早時的高峰下跌了約40%。
跌得咁傷，反彈下，都好平常。昨日亞馬遜、谷歌及Netflix齊彈0.3%，LinkedIn 彈0.6%,相比之下，騰訊昨日彈1.6%，彈力已經跑贏美國同業。
美企公佈業結前夕，市場例牌比較無方向。分析員普遍唔睇好即將派發的美企季度成績表，方亦同時認為美股未來幾個星期的前景會比較黯淡。主要原因係認為，唔少美企上季度業績，營收唔得，全靠節省開支保住盈利，企業盈利難以持續增長。可能好多美企都知衰，做定「期望管理」。德意志銀行策略師指出，美企第一季度的盈利預期已經大幅下調，平均下調幅度與2012年第四季度颶風桑迪襲擊美國時相似，2011年第四季度也有類似狀況，當時企業界受到了歐洲經濟衰退與美國信貸評級被下調等因素的重創。據FactSet的數據顯示，已有超過90家標普500成分公司警告稱盈利可能低於預期。
美國鋁業(Alcoa)昨日收市後公佈今年第一季業績，成績認真麻麻，期內虧損1.78億美元，去同期賺1.49億美元。扣除削減廠房的一次性開支的話，盈利則有9800萬美元或每股9美仙，好過市場預期的5美仙。至於營收方面，期內收入54.5億美元，差過去年的58.3億美元及預期的55.6億美元。美國鋁業昨日正常時段股價靠穩，收市後彈升2.7%。
華爾街ING公司衍生品資深交易員揚纓認為，過去兩個交易日，大市跌幅，尤其是高科技股、生物股非常可觀。對沖基金的long/short的指標，可以和2009年及2011年的兩次大跌有得比。這個跌勢開始得有點莫名其妙，而且不分青紅皂白地傳染到那些基本面較好的股票，市場甚至開始擔心是否會全面影響大市。
佢係好友，認為美鋁公佈業績後，很可能會成為股市轉折點。因為本季度之前的一段時間內，各公司已經將市場對其盈利的期望值降低了，預計有三分之二的公司業績，應該可以勝過市場預期，有望推動大市，佢反市場大方向而行，建議股民可以適當地小心加倉。
陸羽仁
回應(3) 我想回應
陸羽仁 BLOG 舊文
