魚樂無窮：合景兩低一高諗得過 - 唐牛
■雖然隔晚美股再隊，但昨日港股出奇地強。
雖然隔晚美股再隊，但港股出奇地強，恒指反彈219點。原因有兩個︰第一，騰訊(700)玩回購。根據往績，每次股王回購都有見底跡象，呢個憧憬成功為股價築起力場。不過，外圍科網股跌勢未止，加上騰訊衍生工具纏身，又輪證又ELN，要好似以往咁日日破頂，睇怕起碼要等到下個月一拆五除淨之後，先至有計。
第二，舊經濟股終於坐正。內銀、內險、內房、資源股等板塊齊齊發力，重奪資金芳心，但始終內地經濟增長拾級而下，新一代領導人又唔會再喪印銀紙谷經濟，喺政策有保有壓下，合理反彈可期，長期升浪則免問。
現階段究竟係撈新經濟股，抑或追買舊經濟股？正所謂寧買當頭起，唐牛私人持倉新經濟股含量極低，寧願有勢再高追，總好過越撈越低。舊經濟股則採取打遊擊戰略，密食當三番。
PE不足四倍兼享8厘息
內房股合景泰富(1813)去年多賺14.3%至27.5億銀(人民幣．下同)，負債比率由63.5%降至56.3%，派息大增93%至29分，三個數字都靚絕！管理層透露，今年銷售目標將按年增長三成至210億銀，未來北京、上海杭州等地均有項目推出。現價市盈率唔夠四倍，市賬率僅0.6倍，兼且有近8厘息打底，如此兩低一高，直情係蔗渣價錢燒鵝味道！難怪摩通重申其跑贏大市評級，更將目標價調高至6.15港元，潛在升幅三成，絕對係可完成任務。
唐牛
上一則: Follow Me：中國水務應值4.45元 - 高彰坡
下一則: 股場放大鏡：金活炒併購傳聞靠估 - 歐陽風
魚樂無窮 - 唐牛 舊文
