智取大市：龍工長線博double - 晉佳
■龍工主要從事輪式裝載機生產；圖為集團主席李新炎。 資料圖片
股票升唔升，最重要嘅兩件事情，一件事叫做供應，另一件事叫做需求。需求即係市場風險胃納同埋投資者有幾多彈藥，至於供應就可以粗略形容係股票嘅街貨。好明顯，最近需求由新經濟股份轉咗去舊經濟股份，但要決定舊經濟股份追落後嘅力度有幾大，當然要睇埋供應。
新經濟股份來來去去幾個板塊，科網、生物科技、環保、醫藥、博彩，代表股份不外乎銀娛(027)、騰訊(700)、facebook、Google之類，股票供應有限，所以之前炒得咁過癮。但舊經濟股份，股票供應絕對多好多，如果話新經濟股票供應係一個湖嘅話，舊經濟股份一定係大海。換言之，股票供應過多，將會限制舊經濟股份反彈幅度。
招行(3968)、民行(1988)由低位反彈都有兩成，呢種反彈幅度實在唔需要有乜嘢基本因素重估去配合。有一點要注意，係舊經濟最強嘅水泥股噚日都要回吐，以海螺水泥(914)為例，由3月低位升到4月高位足足有35%，噚日就跌咗2.9%，似乎資金要搵更落後股份去追。其他低殘中資股，理論上反彈幅度會比海螺為弱，所以一般低殘中資股短線目標價，只由低位升兩至三成，就要考慮食糊，換言之，已升兩成嘅招行、民行，短線值博空間已經唔多。
建築業好景過內房
博反彈就要搵更落後、更有潛力嘅股。其中，中國龍工(3339)幾值得留意。龍工主要從事輪式裝載機生產，生產建築設備，基本上面向需求同水泥行業差唔多。雖然內地樓市成交急降，或影響建築行業，但係中央除咗興建保障房之外，今年棚戶改造計劃470萬套以上，北京、上海等6個城市試點共有產權房，有機會擴大到其他城市，即使樓市差，都可以想像內地起類似香港居屋同公屋帶嚟嘅需求，令建築行業遠遠好景過內房。
事實上，龍工舊年條數都有改善，舊年收入升3%，毛利率由19.4%升到去23.6%，純利就升咗近2.2倍，去到4.8億元人民幣，每股盈利11分，市盈率11倍，市賬率0.96倍。公司節省成本，令盈利回復增長。
股價一路唔升，當然有原因。市場一直認為佢啲應收賬有水份，當初佢透過融資租約去谷銷量，外界估計搞到有好多爛賬，但又冇乜撇賬，炸彈一日唔爆，大家就唔敢估佢見底。但係舊年佢應收賬達到29.39億元人民幣，按年基本持平，估計佢以融資租約形式促銷已經有所收歛，再加上市賬率唔夠一倍，大概已反映咗負面因素。隨住行業情況改善，龍工收入盈利回升，到時股價回升，大家就慢慢唔記得爛賬負面因素，而家毋須過慮。龍工過往一年股價冇乜點升跌，波幅越收越窄，乜嘢壞消息都消化曬，唔排除大戶喺低位慢慢吸貨，技術上似形成潛伏底，只等爆上確認轉強。短線以3月低位1.39元升25%作為目標價，可睇1.73元，中長線可以買嚟坐定定，等睇3元。
晉佳
本欄逢周三刊登
上一則: 一周三件：飛毛腿睇升七成 - 錢雋
下一則: Follow Me：中國水務應值4.45元 - 高彰坡
智取大市 - 晉佳 舊文
