異動空間 ：晨鳴息高估值平 - 魏力
市傳阿爺將推「穩增長」措施，加上減少正回購，資金借勢挾倉，中資證券、銀行、保險及內房股炒起；水泥股炒完，熱錢轉玩鋼材股，由於板塊轉動太快，見升兩棍先撲入去多數接火棒，所以都係嗰句，忍嚇手，莫強求。
恒指反彈219點，守住10日線，兼突破短期降軌，成交亦配合回升，但整體只有55%股份向上，唔算標青，後市如何，100日線22681是關鍵，升得穿兼企穩再算。
市況淡薄，不如自學，近排睇緊本《盤勢細節分析技巧》，對短炒甚有幫助，值得一讀。順勢短炒，不外乎睇三樣野：成交、圖表、盤路。有時位已破，成交向上飆，但一追入就坐艇，多數係俾莊家「個棚」呃咗，以為「大棚展翅」，點知瞓身掃入後，搭棚工人熄燈收工，買盤人丁單薄，有貨好自然搶住沽，即買即中伏，嗚呼！呢本書就係講點樣判斷買賣盤，邊啲預示炒上，邊啲伏味濃，睇完或有一番新體會。想睇嚇本書嘅樣，可去魏力fb。
個股方面，留意PE低、股息高的晨鳴紙業(1812)。去年純利增長2.2倍至7.1億人仔，末期息30分，歷史PE僅8倍，股息率10厘，昨創一年新高，不妨留意。
魏力
http://www.facebook.com/2012jason
上一則: 何車500：合富輝煌大平賣 - 何車
下一則: 青心直說：食過翻尋味中招 - 胡孟青
異動空間 - 魏力 舊文
