一字記之曰「平」
2014年04月09日
美股前晚續跌，見證咗港股市底略為轉強的觀察，係內地A股造好帶動下，恒指好快轉跌為升，動力仍然係來自國企股份。
唔理收水內銀照升
中資股份走勢轉強，最明顯係人行再度收水，正回購630億人民幣，惟內銀股照升，四大行齊造好，其中工行(1398) 升2.5%最勁。中資股轉番勢，可以用幾個不同原因嚟解話，最直接係資金流嘅改變。
聽做基金的中環茶友講，外資在第一季埋季結後，開始有少少重新佈局的跡象，包括由發達市場，即係美歐套現，同時減持咗一啲新經濟股份，呢個做法解釋咗點解以納指為首的美國股票近日跌得比較多。呢啲套現咗的資金，應該有部份會轉番入新興市場，包括有好重中國成份的香港股票。
中資股好似內銀咁，早前公佈業績，雖然外資一早睇淡，但結果公佈出來的增長仲有低雙位數，壞帳增加亦唔係咁多，你可以唔信佢盤數，話佢繼續將問題掃係地毯底，但業績公佈咗就係公佈咗，短期唔會再有第二個數字出。
係出完最近業績下，大隻內銀股市盈率去到只有5、6倍，息率有6厘以上，係咁嘅數字下，點都有啲基金買吓，咁就令佢哋彈番上嚟。
中資股個勢好番啲，如果無意外事件發生，可能今年最壞情況已經出現咗，但咁樣唔代表大家要急急入市，因為短期之內呢類股份無乜壞消息，但亦似乎唔見得有乜大好消息，引到基金買吓貨，一字記之曰係「平」！
但炒股唔可以只係靠平，仲要有憧憬先得，所以未有消息配合前，股價好大機會載浮載沉，投資者如果想買吓貨，最好都係有啲耐性，候低吸納，咁樣雖然未必可以買平好多，但勝在感覺上會舒服好多，心理上就有優勢。
係中資股氣氛好番下，大市都熱鬧咗啲，成交由周一的576億元，增加至昨日的739億元；同時，大市250天線(22420點)失而復得，午後恒指高見22625點，收報22596點，升219點；國指收報10321點，升164點。
內地保監會公佈《保險公司收購合併管理辦法》，由今年6月份起，允許投資方對保險公司使用部份貸款作出收購，兩家或兩家以上的保險公司，將可合併成為一家保險公司。受消息憧憬，內地保險股全線彈升。
股仔又爆殺人事件
昨日除了大股外，仲有單股仔殺人事件。有隻股仔中國家居(692) 急插，一度急挫超過60%，之後略為反彈就停咗牌，結果比前日跌咗44%，而且成交有成3億元。該股上星期仲造緊0.9元左右，今個星期開市插完一日又插一日，結果跌咗80%，昨日急跌仲有好多散戶走去撈底，結果即撈即蟹，快手者已經打靶，現在公司停埋牌，未打靶者就望天打卦。
中國家居上市多年，業績一向平平，最好反而係去年。該公司生意做得好雜，兼營銷售木製家具、布料、採礦、證券、時裝、放債、訊息及技術服務，咁多瓣生意大部份都蝕錢，最賺錢係家具，而且好賺到有少少離奇，做咗8、9億生意就賺咗2億。最近，公司動作多多，包括買入一幅中山土地，並發行可換股債券，結果發債消息出咗無耐，就傳被人斬倉引致股價暴瀉。
睇番往績，中國家居有多次大比例供股往績，有咁嘅財技記錄，傳被莊家斬倉絕對唔奇怪，散戶夠膽上車，都應該預咗有機會遇上呢種場面啦！
陸羽仁
金融High Tea 舊文
