魚樂無窮：
變身股好戲快上演
■恒指昨成交減至673億，創1個月新低。 李潤芳攝
內地第三季GDP增長6.9%，唔知係冇人信定冇驚喜，中港股市異常呆滯，滬綜指微跌0.1%，恒指只升8點，成交更減少至673億，創1個月新低。不過，悶市下殼股繼續氣勢如虹，日東科技（365）大棍衝穿一蚊
大關，大洋集團（1991）亦大成交破位，今日乘勝追擊，推介已透露有賣盤意向嘅盈進集團（1386）。
「盈進9月已經話易手啦，一棍之後keep住橫行，係咪傾唔掂數呀？」其實內裡大有文章︰盈進大股東為傲捷控股，持有盈進71.06%股權，傲捷則由已故盈進創辦人洪文藝之遺產擁有約90%，其餘10%由其遺孀、即現任盈進主席陳美雙持有。惟洪文藝於2008年去世至今，股權遺產一直未有處理。本月初，盈進發通告表示，清盤人將向傲捷股東作出實物分派，陳美雙持股將達39%，連同兩名女兒持股，總持股達60.4%。
大膽假設賣盤是要等待股權釐清，咁盈進易手相信已到最後階段。事實上，潛在買家中弘控股絕非池中物，主營旅遊相關文化景點及房地產，於深圳上市，最新市值達225億人仔，折合約274億港紙。盈進呢？只得奀豬7億，僅及中弘嘅2.6%，係咁易獲注一成資產，市值足以幾何級數上升。噚日失守1元大關後竟離奇倒升，話唔定聰明錢已經進場，等待這一場盛宴開席呢！
唐牛
https://www.facebook.com/tongcow88
唐牛
魚樂無窮 - 唐牛 舊文
