買科技 沽濠賭
2015年10月20日
港股牛皮反覆，恒指收市微升，但市況唔可以只睇指數表現，因為唔同股份表現不同。大市經過一輪反彈，離低位差不多回升近一成，在預期未來仲係大型上落市下，揀股非常重要，利用反彈沽出欠前景嘅股，買入有上升空間的股票，會係勝負關鍵所在。
內地第三季GDP自2009年
以來首次「穿七」，呢個數字已在預期之內，所以市場唔係太大反應。雖然話「穿七」唔令人意外，甚至可以炒吓阿爺放水，但係咁嘅大環境下，始終要留意個別公司同行業。
上落市要汰弱留強
恒生指數昨日收報23075點，只係升8點，國企指數收報10688，升51點，但在國家主席習近平訪英效應下，市場估核電商極有可能獲得大定單，中廣核電力(1816) 再升3%，報3.65元，證明個股表現好唔同。
投資先要分辨大氣候。如果經濟好，水頭足，股票輪流炒，咁笨豬終於有日都會吹上天，但當水頭唔係咁足，弱股一升就俾人質，小股東反彈唔識走，咁就可能坐艇坐到沉船。如果我哋估計港股仲未有牛市條件，咁股民就應該留意啲有潛力嘅股票買入，同時沽番啲弱股出嚟做換馬本錢。
至於邊啲股份可以睇多啲，雖然內地政策牛碌低，責親唔少股民，但係中央仍然主導最多資源下，阿爺點樣落棋始終好重要。依家內地炒作緊係國務院總理李克強提出，要結合「互聯網+雙創+中國製造2025」催生一場「新工業革命」，另一個觸動外資神經係阿里巴巴宣佈收購優酷土豆，今期順勢吼一批科技股，另外新能源股炒咗一輪隨時會調整吓，但呢個板塊應該未玩完。
呢期內地資金興炒科技股，主要是月底中央領導人在五中全會，依家阿爺除咗話加大番投資同谷番郁地產外，仲係無一個產業火頭。依家歐洲龍頭德國提出以資訊科技配合工業的新革命，似乎為內地提供咗靈感，預期五中全會會提出要以互聯網推動工業升級，本地好多科技股都比高位回落不少，投資者可以從中尋吓寶。
另一單市場大消息係阿里巴巴提出全面收購優酷土豆(美：YOKU，已更名為合一集團)，交易作價料逾45億美元。在阿里巴巴提議下，優酷創始人古永鏘將續擔任公司主席及首席執行官，並通過此次合作，實現打造中國領先數字娛樂平台的夢想。在港上市的阿里影業已偷升。阿里影業(1060) 昨日升至2.29元後回落，收市報2.16元，只係微升一仙。由於佢累積升幅唔細，短期不如買吓有相同概念嘅騰訊(700) 。
阿里影業無謂高追
在大市唔牛氣澎湃下，投資者無需要投入太多資金，買股之餘最好係沽番啲前景一般股份，昨日賭股回吐顯著，金沙(1928) 急挫6.4%，報28.6元；銀娛(027) 挫5%，報26.7元，兩者成為包尾藍籌股，我覺得唔係偶然現象。濠賭股借住個市反彈炒番上一浸，但前景唔好講話好番，就算連見底未都唔敢肯定。
有澳門朋友講，最近澳門賭收表面睇跌勢喘穩，實際上仲要睇內地經濟表現係咪已經到底。最重要係就算賭收見咗底，唔代表佢哋經濟情況有改善，因為依家博彩設施仲係增加緊，估計容量差不多翻一倍。未來有好多新場要搵客去填，係需求無增加供應卻要加倍下，各種成本支出大增之餘，仲可能觸發割價競爭。依家澳門酒店房價已經大跌，但仲未反映未來新增加的供應，所以分析濠賭股唔只係睇賭收，仲要睇埋未來供應，所以佢股價反彈，應該係沽貨唔係落注嘅機會。
陸羽仁
金融High Tea 舊文
