智取大市：
市盈率反映三個事實
如果炒股票嘅方法係以價值投資法、技術分析法同財技分析法去區分，要培養到炒股票賺錢嘅實力，以上方法樣樣都要識，雖然同一時間用太多張刀，呢種方法叫你沽，嗰種方法又叫你買，有時會提供矛盾嘅結論，但每張刀喺唔同情況都有用途，不能忽視，重點係，啲刀應該係點樣運
用，同埋喺乜嘢情況之下運用。
以上投資方法大家都聽慣聽熟，就講最簡單嘅市盈率，背後意義又有幾多人能夠明白？
市盈率，好簡單，係股價除以每股盈利。好多人用市盈率去定奪一隻股平定貴，20倍叫貴，6倍叫平，錯唔曬，但只係反映其中一個事實。
市盈率反映嘅第二個事實，係盈利穩定性。舉例說明，喺同業股份之間作比較，例如騰訊（700）市盈率30倍，阿里巴巴25倍，除咗有可能反映騰訊未來盈利增長多過阿里巴巴之外，亦有可能反映騰訊盈利增長穩定性高過阿里巴巴，例如騰訊微信廣告未來三年每年大幅增長實食冇黐牙，令每股盈利每年增長30%；但阿里巴巴最強項嘅淘寶天貓，可能受京東威脅，令其每股盈利有可能增長40%，又有可能只增長20%，投資者寧取盈利增長穩定嘅騰訊。所以要記住，市盈率除咗反映盈利增長能力，某程度上亦反映盈利穩定性，盈利變數越低，市盈率就會越高。
平與貴是浮動指標
市盈率反映第三個事實，係唔同嘅升跌周期，例如你覺得港股值14倍市盈率，就並非永遠都係值14倍，因為股市有時樂觀，有時悲觀，有時睇經濟增長，有時睇經濟衰退，例如喺熊市，港股市盈率最低可以跌到8倍以下，但牛市之時，最高又可以升到去20倍以上。
如果你估計港股基本因素好大鑊，內地金融體系爆煲，港樓急跌，失業率勁升，美股插到反艇，仲衰過金融海嘯，恒指10倍PE算唔算平？極端情況下，市盈率最低可以跌到7.5倍，仲可以有25%下跌空間，呢一刻未必係平；如果你覺得將會出現牛市，乜嘢都能夠起死回生，仲要出現另一個大時代，市盈率可以誇張到20倍，咁10倍當然係超平。
所謂平定貴，絕對係一個浮動指標，所以運用市盈率，最基本最基本嘅規條，就係比較，要比較唔同歷史周期嘅市盈率，要比較唔同股票嘅市盈率，要比較唔同股市嘅市盈率。講到尾，要有客觀嘅比較，先知道你買嘅股，面對一種乜嘢狀況，進而能夠發現機會。篇幅有限，其餘市盈率嘅意義，等緊大家發掘，有勞各位自行參透。
大市方面，恒指23500點就係之前跌穿嘅月線圖上升軌水平，晉佳會視呢個反彈為長線跌浪嘅後抽，去到呢個位，大價股可考慮沽，短炒氣氛轉弱的話，近期熱炒嘅二、三線股亦要減持。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
