中環在線：百萬泳一公里賽
吳宗權腳傷照獲獎
■吳宗權話早排整親隻腳，所以今次志在參與。 張志華攝 
商界噚日有兩場大型活動，中環有「鼠戰中環」，淺水灣就有「第三屆公益金會德豐百萬泳」，雖然話過咗廿四節氣中嘅「霜降」，但噚日感覺
和暖，仍適合落水玩，對於遊泳健將、會德豐（020）主席吳宗權（Douglas）更加係easy job。
身兼活動籌委會主席嘅Douglas，噚日朝早8點半就掛住招牌笑容，現身淺水灣沙灘，差不多一見到人就停低傾幾句，然後嚟個合照。
舊年喺百萬泳公開賽得第二嘅Douglas話，早排整親隻腳（表面睇唔到佢整親邊度），最近冇乜練水，但係都會落水玩嚇，與眾同樂咁話。
佢今年出戰三場賽事，包括領袖賽、機構接力賽、同埋新設嘅黃金一公里泳賽。頭兩個賽事，佢三甲不入，一公里賽就以17分13秒得第三，呢項比賽要遊水兼跑沙灘，成績算係咁喇。
■龐超貽（左）與龐建貽（右）齊齊攞獎。 至於有14位富二、三代兼企業高層參與嘅領袖賽，冠軍與季軍都係「鋼鐵大王」龐鼎元家族成員，分別係紹礦資源董事總經理龐超貽，同埋新世界發展（017）主席鄭家純女婿龐建貽。龐超貽舊年都奪冠，今年以3分36秒遊完200米。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
