一周三件：北京建設超平
■內地網購電貿火熱，衍生龐大物流需求。 資料圖片
北京建設（925）話要打造為內地三大物流企業之一，但市值奀到得38億元，只係姐妹公司北控（392）市值嘅6%，PB兼且係成系，同名牌行家中至抵搞。北控集團透過全資揸北京建設67%，同北控係同一級嘅姐妹企業，北
控市值660億元，已肥肥白白，係北京建設市值嘅18倍。
北京建設上年年報度，定咗目標，四年內建成300萬平方米倉庫、100萬噸冷凍倉庫儲存量，同成為中國物流三大公司之一。家陣星洲上市、祖國最大物流商之一嘅普洛斯（GLP），市值620億港元，亦講緊係北京建設市值16倍！
大搞物流有睇頭
網購電貿火熱，衍生內地龐大物流需求，北京建設食到應。又北京建設唔使隔咗一層北控，而直接由強勢阿媽北控集團湊大，再對應北控市值size，對北京建設快高長大，係超有遐想！
又以計劃中300萬平方米倉庫做準，粗略咁計，每方米日均租金1蚊人仔咁大把，北京建設順風順水嘅話，中線每年恒常性收入，已經高達13億港元。但集團超強背景，斷估唔單單志在呢個倉儲目標size，呢嚇先爆炸。北控系10隻股票，北京建設家陣0.89倍PB，專業預估明年0.78倍PB，最近磅係北控，但都講緊1.1倍PB，最貴北控潔能（1250），高達11倍PB，北京建設PB平絕成系！
嘉里物流（636）明年預估1.2倍PB、深圳國際（152）1.1倍PB、普洛斯0.9倍PB，北京建設亦至抵搞。煲北京建設，現價（0.57元）翻半番到0.86元，預估PB先追到祖國行家，市值得57億元，都仲未去到普洛斯嘅十分一size。
錢雋
細價股專家
本欄逢周一、三、五刊出
錢雋
一周三件 - 錢雋 舊文
