財經評論：討論樓價故事
■近期樓市最呃like新聞必然是二手減價。 資料圖片
近期樓市最呃like新聞必然是二手減價，人人期望離地樓價回落至大眾街坊價，但問題是，究竟哪一個才是大家負擔得來的樓價水平呢？
阿甲話：「起碼要到2008年金融海嘯價啦！」阿丙意見較冷門：「最好係2006年加息嗰陣淡
市價！」阿戊則比較黑心：「一係唔跌，一跌就最好沙士價，咁我就可以掃番幾個單位！」最後阿爺一句：「我後生嗰陣萬幾銀一層樓咋，嗰陣時鬥零都買到條油炸鬼！」連陳百強同陳百祥都分唔開的一眾甲丙戊立即開口窒阿爺：「幾十年前啲樓咁平，你嗰陣買番十層八層，而家咪印印腳囉！」阿爺有氣沒力的說：「嗰陣你阿爺我搵十萬九千七一個月咩？一般打工仔賺夠錢養家都好叻喇，仲咁大想頭買多幾層樓等升值？如果一早知道穿膠花可以發達我都做咗超人啦！」
此時突然傳來謎之聲：「有早知何來乞丐，當年太古城入場樓價只需要200餘萬元、淘大花園不足100萬元任揀之際，市場上又有幾多認為前路滿希望的買家選擇入市？與其繼續寄望於樓市預言家的十講九騙，倒不如期望可以回到未來，知道將來就可以計劃現在了。」
多數沒有結論
廢話指數極高的謎之聲，令阿爺甲丙戊難得一致槍口對外，齊齊罵道：「你個白癡收聲啦！而家講緊樓價貴得唔合理呀，就算跌番三五七成都唔過份呀！」咁點先算合理呢？「跌到我哋都買得起咪就係合理水位囉！」咁太古城200幾萬元買唔買得起呢？「真係200幾萬嘅話，一定仲有得跌，使乜咁心急買？」噢……謎之聲揚長而去，恍惚從來不曾存在過一樣。
一篇不像故事的牙痛短文，正好是互聯網討論區或樓市新聞留言欄上最呃like的對話片言隻語。現時，不論是金融區米芝蓮抑或路口間茶餐廳，都有不同身份的食客為樓價升跌談個興高采烈，最常見的結果是根本沒有結論。
記者：伍志輝
伍志輝
財經評論 舊文
