中環在線：BeLLE今年關閉七分店
百麗怨投行 𠱁來港開店
■盛百椒話，一早就覺得BeLLE品牌略老土，不適合香港。
有「鞋王」之稱的百麗（1880）今年8月閂曬香港7間專賣女裝鞋嘅「BeLLE」分店，市場擔心佢係咪生意好差，公司首席執行官盛百椒噚日就爆料話，2007年上市時，佢
哋被投行賓架積極遊說，先至免為其難將BeLLE品牌帶入香港，「品牌略土，一早就知道不適合香港」。
■BeLLE包括圖中位於中環的分店已關閂。 資料圖片 
「基本不賺錢」
盛百椒指，百麗當年來港上市，有投行建議佢哋在港開間BeLLE打響名堂，「他們說，你們在香港上市，BeLLE又跟公司同名，所以就開幾個店」。
盛百椒好認真咁話，當年已經認定BeLLE嘅定位唔適合香港，早前關店時，有傳媒大肆報道，佢覺得好詫異咁話，「是很小很小的事情，怎麼這般重視？」
BeLLE在港做咗幾年生意，盛百椒透露「基本不賺錢，但也沒有虧很多，我根本沒有當回事」，品牌結局，亦跟佢當初預計相同。翻查資料，百麗當年上市嘅保薦人包括大摩與瑞信，究竟係邊啲賓架，醒咗個咁好建議畀百麗管理層呢？
雖然話BeLLE已經撤退，但百麗仍有7個品牌在港經營、包括STACCATO、JOY& PEACE等等，約有150間分店。盛百椒強調，冇計劃調整其他品牌或者再退出市場。他引述數據指，百麗去年在港賣出150萬至160萬對鞋，佔香港人口22%至23%，反映產品好有需求。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
