淺水暢泳
2015年10月28日
外圍回軟，港股一度下跌，但內地股市探底反彈，帶動港股回升收市。中美上月高層會晤仲好似幾好，很快就變臉，美國出隻導彈驅逐艦到南海，氣氛一緊，軍工股即爆上。
軍工股炒南海緊張
港股喺回吐下試底，跌得深啲又暫時跌唔落去。特別係媒體報道，美國海軍一艘驅逐艦已經進入南
海中國人工島周邊，並在美濟礁附近水域展開巡邏。中央警告美方：三思而後行，不要輕舉妄動，午後美國軍艦靠近南海中國人工島消息刺激下，軍工板塊應聲大漲，帶領上證指數收報3434點，升4點；深成指數收報11758點，升70點。創業板指報2563點，漲36點。
港股全日亦先跌後回升，恒生指數收報23142點，升26點；國企指數收報10714點，跌32點，成交縮至690億元。熱錢流入港元，令港匯持續偏強，金管局再向市場注入116.25億元，壓抑港元強勢，令銀行體系結餘預測在星期四增至4175億港元。
外資湧入港元強勢
之前習大大到美國訪問時，中美關係好似好好，軍工股謝晒，如今借住呢個消息炒作一輪，A股軍工板塊都借勢翻身。香港隻中航科工(2357) 都借勢大升5.2%。炒軍工股炒高少少都要睇位食胡。
中港股市跌唔落，跟住聯儲局將召開一連兩日議息會議，大多數市場觀察家都認為，聯儲局今次唔會有動作。有分析認為，十月份本來加息機會唔大，再加上歐洲央行話有可能再推量寬，咁聯儲局變得更被動。之前九月份聯儲局加息之說高唱入雲，但喺華爾街大鱷連環發功下，主席耶倫終於唔敢郁手，依家有講法聯儲局最多喺年底加息一次。來年又到美國大選，央行無理由大力加息，所以美國上調利率的窗口已逐漸消失，呢個亦係近期美股炒上的理由。
內地雙降魔咒再度靈驗，兩地股市喺好消息下腳軟，內房股喺消息公佈翌日仲頂得住，但跟住都要跌一跌。陸羽仁建議投資者雙降咪高追，甚至可以食胡。好似內房股，成份股華潤置地(1109) 單日就曾碌低4%，全日高低差價近1元，收番21.5元，若然高位出貨，低位撈番，已經有肉食，雖然只係食幾個巴仙的雞胡，但喺上落市中，呢個單日幅度其實都幾和味。
喺內地放水下，為中港股市底部增加承托，個市暫時不虞大跌，但同樣依家個市唔係大牛市，向上好難話急急去番兩萬五、六關，咁即係話個市會喺兩、三千點間浮游穿梭，變成一個淺水區域，大家喺度游來游去，就要適應吓，唔好預期有大動作。
內房睇位可以走一轉
現在較合適的戰術，其一係揀一些自己熟悉、有實力、有息派的大股，好似內房大股睇好位低買高沽，但唔好預期水位好深，咁樣雖然講出來唔係咁精采，但勝在實用，比起個市「嘭嘭聲」爆上，風高浪急，依家可以有另一番風光。
另一單新聞係世衞將加工肉類食品同紅肉列為致癌物質，呢單新聞直接衝擊加工食品業，好似做腸仔、煙肉的企業。雖然食加工肉對身體唔係咁好，說法已經廣泛流傳，但依家世衞搞到將呢類食品直接同癌症掛鈎，玩到咁大，影響又好唔同。
美歐食品同快餐生意係成熟行業，利潤唔算得高，所以一直要靠廉價同大量生產、工序簡單食材來營運，若然快餐業因為法例監管收緊，唔能夠使用呢類食材，成本有可能大幅增長，過程中有無足夠時間轉型，對企業係一大考驗。以前食品同餐飲股被視為防守性高的投資，但隨着消費權益同健康意識提高，令食品安全成為食品股一大風險。
陸羽仁
金融High Tea 舊文
