中環在線：股評人搞talk show得個吉 - 李華華
■黃國英將連續第三年搞財經界棟篤笑。設計圖片
財經界興起棟篤笑，始祖黃國英(Alex)下月底連續第三年搞talk show，舊年玩埋一份嘅兄弟檔沈大師(沈振盈)同Eugene(羅尚沛)今年都心鬱想再玩。但原來搞一場show成本起碼20萬至40萬元，要回本除咗門票要賣得好，仲要搵夠贊助先得。Alex就連年蝕錢，沈大師唔使蝕都只夠食餐飯，搞場show似乎都係得個吉。
蝕錢居多純為建立品牌
Alex過去兩年，每年喺伊館舉辦一場talk show，佢透露搞一場show，成本要30萬至40萬元，場地、佈置同宣傳成本嘅佔比最大。即使入座率有八、九成，但部份門票會派畀佢自己嘅基金客戶，加上冇乜點樣搵贊助，所以根本冇可能回本，今年亦預咗要蝕。
「我哋呢啲性格唔可能招攬輪商，唔通轉頭又unfriend咩？」意指費事搵人贊助，轉頭公開講對方唔啱聽評論。
佢話過去兩年嘅talk show每場都蝕十幾萬元，但搞show係建立基金品牌，唔可以用商業角度去睇，所以堅持繼續搞，但就會推多啲門票出去賣，只求現場氣氛好。
沈大師跟Eugene舊年喺九展舉辦talk show，Eugene透露，單計場地同佈置已經花費20萬元，其餘宣傳同雜項可免則免，最終成本都要廿幾萬元。好彩佢哋搵到唔少朋友仗義幫忙，兼且有一大堆贊助。
事實上，去聽財經talk show嘅多數係股民，唔少金融機構睇準呢班目標客戶群而提供贊助，部份仲會喺現場擺推廣攤位。沈大師佢哋就係多得贊助商，埋單唔使蝕。
Eugene同沈大師今年初傾過添食，但太忙未有行動。Eugene估計最終成事機會一半半；如果搞得成，會繼續寸嘴本色，仲要有錢賺喎。
李華華
mailto:LiWaWa@AppleDaily.com
■沈大師(左)同羅尚沛今年都心鬱想再搞番場talk show。
上一則: 渣打首季業績聚焦售資產進度
下一則: 中環在線：Burberry高層過檔蘋果5.3億元股份唔易袋 - 李華華
中環在線 - 李華華 舊文
