股係自己嘅好
2014年05月07日
港股佛誕休市，假前港股唔係咁靚仔，主要係內地公佈數據反映經濟持續放緩。香港對內地數據反應強烈，內地就相對平靜，A股昨日牛皮，上證指數全日波幅只有百零點，最終微升唔夠1點，幾乎可以用水波不興嚟形容。
恒指家測試緊22000點有無反彈，早排揸咗21500點收回價的牛證股民，家隨時係鱷口徘徊嘞！
陳總歎投資環境攞命
呢排港股氣氛平平，大家觀望情緒高漲，依家基金經理心態係無論中港都係處於經濟調整期，買乜都好容易中招，部份資金寧願落注係美英市場。外匯基金宣佈最新一季業績，港股蝕咗幾十億，總裁陳德霖做定期望管理，話今年係投資困難的一年。
金管局陳總咁講，固然有大機構高層行騎樓底都戴鋼盔的作風，但亦唔係完全無根據。以金管局的組合嚟講，唔可能唔揸啲港股、外匯同債券，但呢幾類資產係美元轉強下都好可能受壓調整，咁搞法等如要綁住兩邊手同人打交，要追番唔輸已經唔易。嚴格嚟講，香港資產係用美元計價，故此無論股票、物業，都可以歸入美元資產類別，呢啲投資工具喺美元轉強、美息向上的大環境下，做到保本已經唔易，遑論升值。
以金管局的網絡同資源，連佢哋嘅總裁都話今年投資難度咁攞命，散戶係咪應該要打醒十二分精神先！
大環境要留神，除了係因為美國退市、資金成本上升，本地經濟亦出現高位運行等待調整的周期。
黃金周旅客數字公佈，錄得自2003年自由行開放以來首次下跌，零售股表現弱，連帶受惠自由行的收租股九倉(004) 股價都被波及，周一收報52.65元，挫逾3%。
當九倉股價下跌之餘，持有九倉控股權的會德豐(020) 主席吳光正家族，就入市增持旗艦公司會德豐股份。吳主席一向以數口精見稱，有人就問從中係咪可以見到微言大義呢？
地產公司大股東增持股份，今年都見唔少。中環茶友話人嘅心理好得意，有人講笑話飯是隔籬的香，文章卻是自家的好，咁股票又點睇呢？隔籬飯香係因為飯係阿媽煮，食得多就會悶；文章係自己寫，咁就百看不厭，至於股票點睇，分野就在於係咪自己經營。若然盤生意係自己，落足成擔心機，當然特別認識到佢嘅優點，如果有錢自然要買貨，買貨都自然要買佢先。
主婦食家口味有分別
以會德豐為例，佢最主要嘅資產係九倉股權，近年開始大舉進軍房地產，經過一輪播種，中港兩地項目都開始踏入收成期。雖然內地樓市今年開始「立立哋」，但會德豐不少項目已經銷售，未來資金同盈利就會回籠，作為大股東當然覺得抵買，加上海港城呢啲咁靚嘅資產，長遠唔會點衰，秤過度過有閒錢在手，就會諗不如捧番自己場，好過周圍搵投資啦，呢個係從基本因素去分析。
至於基金經理對資產股失去興趣，係覺得美國收水，不利呢類股份，佢哋係從不同資產價格同回報比較去決定點落注，唔係從個別公司的經營角度去睇。
從基金經理以至其他散戶立場嚟睇，盤生意唔係自己，就好似出街食飯，啲餸唔係自己煮，咁就要講啱唔啱自己口味，仲要講有無新鮮感，內裏無乜感情因素，咁感覺又唔一樣。茶友打咗個比喻，大股東係主婦，梗係鍾意食自己的住家菜，基金經理係食家，周圍去揀好嘢食。
要記住係，大股東自己早已揸到成手貨，唔買得幾多，增持的承托力有限，基金經理先係專業買家，所以短線計，大股東增持，同散戶應唔應該跟住入貨，道理一字咁淺啦！
陸羽仁
金融High Tea 舊文
